us ke tarz-e-guftugu pe dil fida ho jaega
han magar ye dil kabhi sahra numa ho jaega

ho agar mumkin sadaf kei rah dikhla de use
warna har qatra hawaon mein hawa ho jaega

aadmi ne aaj tak khoya nahin apna wajud
aaina tuta agar to hadisa ho jaega

bandh le rakht-e-safar jab fasle ka dar nahin
ba-amal hai jo bhi manzil aashna ho jaega

soch kar rakhna hamesha apni chahat ka bharam
warna khud se tu hi khud na-ashna ho jaega