jaane kyon ab ye guman hone laga hai mujh ko
jaise muddat se koi dhund raha hai mujh ko

bol kis mod pe hun kashmakash-e-marg-o-hayat
aise aalam mein kahan chhod diya hai mujh ko

khana-zadan-e-khirad kuchh to karen rahbari
ye junun jaane kidhar le ke gaya hai mujh ko

aisa lagta hai ki ab to na bharega ta-umr
zakhm jo khwab-e-shikasta ne diya hai mujh ko

meri taqdir mein tahrir hai tanha-safari
khud se shikwa na koi tum se gila hai mujh ko

aashiyan shakh-e-hawadis pe banaya tha 'shamim'
baad ek umr ye malum hua hai mujh ko