jaane kyun hai zehn ghaalib ki main soya hua hun
aaina-khana-e-aflak mein khoya hua hun

hun musallas ya koi daera tajridi sa
zehn-e-yazdan mein main tamsil sa goya hua hun

naddiyan bhar gain labrez hain dariya sare
hai ye barsat ki jal-thal ki main roya hua hun

jaanta hun ki ye hasrat hi meri manzil hai
shauq ki tishna zaminon mein jo boya hua hun

dard ka kya hai mere chhed mujhe pyare hain
main tamannaon ke kanton mein piroya hua hun

chirti hai jo sada maut se sannate ko
kya ye tu hai ya main apne hi se goya hua hun

mere chehre ki darakhshani se mayus na ho
sirf itna hai ki ashkon se main dhoya hua hun

gasht-e-aflak ki hajat mujhe kyun kar hogi
main khud apne hi khalaon mein samoya hua hun

'asim' ab ke jo main dubun to kuchh aise niklun
jaise lafzon ke samundar mein bhigoya hua hun