jab azm ke shoalon ko himmat ne hawa di hai
tufan ne hi sahil ki taswir dikha di hai

shoalon se gila kaisa bijli se shikayat kya
gulshan ke nigahban ne har shakh jala di hai

chaha tha karen un se kuchh shikwa-e-be-mehri
lab hilne se pahle hi saugand khila di hai

ek wo bhi hain marte hain jo nang-e-wafa ban kar
har war pe hum ne to qatil ko dua di hai

kanp uttha hai jaane kyun har tar-e-nafas 'sumbul'
jab mere buzurgon ne jine ki dua di hai