jala hun dhup mein ek shahr-e-rang-o-bu ke liye
mili hai tishna-labi sair-e-ab-e-ju ke liye

tere badan ki mahak ajnabi sahi lekin
mere qarib se guzri hai guftugu ke liye

junun ka pas wafa ka khayal husn ka gham
kai charagh jale ek aarzu ke liye

na aansuon ke sitare na qahqahon ke gulab
koi to jashn karo apne mah-ru ke liye

nae sawal nae tajarbe nae chehre
hazar mod hain ek meri justuju ke liye