jab bhi un se kalam hota hai
har sukhan na-tamam hota hai

ishq jis ke hazar mani hain
ek sada payam hota hai

wo nafas jis mein teri yaad na ho
aashiqi mein haram hota hai

gham ki azmat na jaanne walo
gham ka bhi ek maqam hota hai

kucha-e-dost ka har ek zarra
qabil-e-ehtiram hota hai

maut go talkh hai magar is se
ek sukun-e-dawam hota hai

aalam-e-be-khudi mein ai 'jauhar'
un se aksar kalam hota hai