kaun jaane ki takhayyul mein hain paikar kitne
but tarashega abhi aur ye aazar kitne

hum ne ek qatre ka ehsan gawara na kiya
pi gae log khuda jaane samundar kitne

yaad aate hi teri aae khayalon ke hujum
ek paikar se tarashe gae paikar kitne

ho wo mazhab ka labaada ki siyasat ka libas
log phirte hain yahan bhes badal kar kitne

shahr phulon ka jise hum ne samajh rakkha tha
hum pe phenke gae us shahr mein patthar kitne

jo kuchh in aankhon ne dekha hai wahi kya kam tha
aur dekhenge abhi dekhiye manzar kitne

ek saqi ke na hone se hai mahaul udas
aaj tode gae maikhane mein saghar kitne

bijliyan girtin chaman par to koi baat na thi
aatish-e-gul ne jalae hain yahan ghar kitne

dil wo qatra hai ki hasti nahin jis ki mahdud
isi qatre mein hain poshida samundar kitne

ek tum hi nahin duniya-e-adab mein 'jauhar'
hain isi bahr mein kya jaaniye gauhar kitne