jab kisi ne haal puchha ro diya
chashm-e-tar tu ne to mujh ko kho diya

dagh ho ya soz ho ya dard-o-gham
le liya khush ho ke jis ne jo diya

ashk-rezi ke dhadalle ne ghubar
jab zara bhi dil pe dekha dho diya

dil ki parwa tak nahin ai be-khudi
kya kiya phenka kahan kis ko diya

kuchh na kuchh is anjuman mein hasb-e-haal
tu ne qassam-e-azal sab ko diya

kisht-e-duniya kya khabar kya phal mile
tukhm-e-gham hum ne to aa kar bo diya

ye bhi nasha mai-kasho kuchh kam nahin
de na de saqi pa tum samjho diya

'shad' ke aage bhala kya zikr-e-yar
nam idhar aaya ki us ne ro diya

zumra-e-ahl-e-qalam mein likh ke nam
khud ko nahaq 'shad' tu ne kho diya