jab talak zikr aap ka na kiya
hum ne khud se bhi rabta na kiya

tut jaane ke khauf se hum ne
aaine ka bhi samna na kiya

ek qayamat bapa rahi dil mein
lekin un se koi gila na kiya

hijr-name pe dastakhat to kiye
aur bichhadne ka faisla na kiya

bol sakte the hum bhi lekin hum
chup rahe un ko be-maza na kiya

us taraf khamushi kuchh aisi thi
hum ne izhaar-e-muddaa na kiya

kam hi damon kahin se mil jata
khud hi dil ka kabhi pata na kiya

kaise 'iqrar' hain sukhan-war wo
harf ko surat-e-diya na kiya