jab se ek shokh-nazar phail gai chehre par
aatish-e-barq-o-sharar phail gai chehre par

baat chupke se mohabbat ne mere kan mein ki
aur khushiyon ki khabar phail gai chehre par

rah mein us ki jalae the umidon ne charagh
raushni ki thi kidhar phail gai chehre par

kis ne shishe ki tarah tod diya tha us ko
chot dil mein thi magar phail gai chehre par

sal-ha-sal ki raaton ke pare aai thi
umr bhar ko wo sahar phail gai chehre par

sard-jazbon pe taras kha ke ye ehsas ki dhup
dil pe karne ko asar phail gai chehre par

gham ke kuchh sang-e-garan jab se mere dil pe gire
ek nadi thi jo udhar phail gai chehre par

khwab manzil ke sajae the meri aankhon ne
aur 'hina' gard-e-safar phail gai chehre par