jab se rabt kisi se tuta aksar aisi baat hui
yaad ke baadal lahrae phir ashkon ki barsat hui

qatl-e-wafa mein hath tha un ka is ko kis ne jaana hai
nam pe un ke harf na aaya ruswa meri zat hui

raat ki tanhai mein jab bhi yaadon ke kuchh phul khile
un ke istiqbaal ko hazir taron ki baraat hui

kahkashan ki phulwari mein saj kar aaya tha koi
mere jiwan mein ai logo aisi bhi ek raat hui

pyar ke ruthe sapne phir aaseb ki surat lahrae
dil ke zakhmon ki khushbu se hasil ye saughat hui

ek din rah mein rok ke mujh ko kahne lage sunte ho 'rais'
har takhliq tumhaari pyare aks-e-mahsusat hui