jab tak dil-e-khwabida bedar nahin hota
mai-khwar haqiqat mein mai-khwar nahin hota

jo chiz hai duniya ki ek khas atiyya hai
qatra ho ki zarra ho bekar nahin hota

dekha hai jinhen waqf-e-adab-e-gham-e-jaanan
un se gham-e-jaanan ka izhaar nahin hota

hamdardi-e-alam par kya naz kare koi
jab dil hi mohabbat mein gham-khwar nahin hota

tum sher to kahte ho ye ilm bhi hai tum ko
dil se na agar nikle talwar nahin hota

inkar ka matlab hi iqrar-e-mohabbat hai
'shair' lab-e-jaanan par iqrar nahin hota