jab wo kahta hai samundar hai kinaya us ka
rang yak-lakht badalta hai sarapa us ka

kab pukarega bhala nam bhanwar se mera
kab bhala aaega phir mauj mein dariya us ka

dil to tahzib-e-ana ka hai parastar magar
kya kare koi jo ho jae ishaara us ka

kab sanwarega wo taqdir mere lafzon ki
kab nazar aaega ashaar mein chehra us ka

khud ko is tarah se gumnam kiya hai us ne
shahr to shahr raha bhi nahin sahra us ka

main to badnam sahi khair koi baat nahin
chand jo dekhta rahta hai daricha us ka

sath jab donon chale the to kahan chuk hui
mera koi bhi nahin aur zamana us ka