jab zulf sharir ho gai hai
khud apni asir ho gai hai

jannat ke muqable mein duniya
aap apni nazir ho gai hai

jo baat teri zaban se nikli
patthar ki lakir ho gai hai

honton pe tere hansi machal kar
jalwon ki lakir ho gai hai

jo aah meri zaban se nikli
arjun ka wo tir ho gai hai

shayad koi be-nazir ban jae
wo badar-e-munir ho gai hai

ai baad-e-saba tu chhu ke gesu
khushbu ki safir ho gai hai

aawaz-e-shikast-e-dil hi 'unwan'
aawaz-e-zamir ho gai hai