jafa-e-ahd ka ilzam ulat bhi sakta hun
use yaqin na tha main palat bhi sakta hun

main apne ishq mein shahin mizaj rakhta hun
palat to jata hun lekin jhapat bhi sakta hun

junun mein zulm ki gardan utar leta hun
to ek nigah-e-mohabbat mein kat bhi sakta hun

adu-e-shahr main barud hun mohabbat ka
hadon se baat badhegi to phat bhi sakta hun

bisat-e-arz pe chahun to phail jaun main
ho ramz-e-yar to dil mein simat bhi sakta hun