jafa ki rasm-e-sitam ka riwaj badlega
faqih-e-shahr ka aakhir mizaj badlega

main jaanta hun badalti ruton ki khushbu se
hawa-e-dasht tera imtizaj badlega

jumud-e-marg numud asl zindagi hai to phir
jo kal na badla yaqinan wo aaj badlega

khulus-o-mehr-o-wafa khwab ho gae jaise
na jaane kab ye nahusat ka raj badlega

nae shuur ke charche hain chaar su 'akhtar'
mujhe yaqin hai ye kohna samaj badlega