jagti hun main raat-bhar tanha
zindagi ho rahi basar tanha

zindagi ke ajab do-rahe par
kar gaya mujh ko rahbar tanha

sari khushiyan to aarzi hain magar
hai faqat dard-e-mo'atabar tanha

kitne tare falak pe hain lekin
chand karta hai kyon safar tanha

qafile manzilon pe ja pahunche
rah gai dil ki rahguzar tanha

khwab palkon pe so gae sare
jagti rah gai nazar tanha

shama khushiyan to bant deti hun
ashk piti hun main magar tanha