jald-az-jald bichhad jaun dua de mujh ko
yahi behtar hai tere haq mein bhula de mujh ko

har koi sabr ki talqin kiya karta hai
kaise karte hain koi ye bhi bata de mujh ko

main hun sadiyon se bhatakta hua pyasa dariya
ai khuda kuchh to samundar ke siwa de mujh ko

mujh sa diwana nahin sab ko mayassar pyare
ab teri marzi hai chahe to ganwa de mujh ko

is se pahle ki khamoshi mujhe pagal kar de
us se kahiyo ki zara aa ke rula de mujh ko

in dinon dost mere sare hi ruthe hue hain
mere dushman yahi mauqa hai hara de mujh ko