jale charagh bhala kaise ta-sahar koi
hawa ke pas nahin dusra hunar koi

ubharti dubti guzre hue visal ki naw
badan ke bahr mein padta hua bhanwar koi

ye dil-jazira kisi dhund ke ghilaf mein hai
so ab jahaz nahin aaega idhar koi

udas chand ne dariya ke dar pe dastak di
khush-amdid ko badhne laga bhanwar koi

kisi sawal ka chehra kisi khayal ka phul
nawah-e-jaan mein kahan harf-e-mo'tabar koi