jalta raha hun dil ko jalata raha hun main
daman-e-husn dost bachata raha hun main

har chand zakhm dil hi pe khata raha hun main
un se magar nigah milata raha hun main

wada ki sham aap to aae nahin magar
dil ko bajae shama jalata raha hun main

kaif-e-tamam-e-ishq ka aalam na puchhiye
khud un ko bhi sharab pilata raha hun main

tera khayal tera tasawwur liye hue
zarron ko aaftab banata raha hun main

'makhmur' meri be-khudi-e-shauq dekhna
parda uthe hue bhi giraata raha hun main