jalwa-e-jaan-faza dikhata rah
dil-e-be-jaan kun jalata rah

dil hamara gharib-khana hai
gah gah is taraf bhi aata rah

khushk hote hain dam-ba-dam lab-e-zakhm
aab shamshir ka pilata rah

ishq aata hai fauj-e-gham le kar
tujh kun kahta hun hosh, jata rah

taki khush howe gul-badan bulbul
akasr apni ghazal sunata rah

mansab-e-ishq hai agar tujh kun
naubat-e-ah kun bajata rah

shama-ru sin 'siraj' ja kar bol
ki patingon kun mat jalata rah