jalwon ko baryab kiye ja rahi hun main
qalb-o-nazar kharab kiye ja rahi hun main

bahki hun main latif jawani ke kaif mein
har chiz ko sharab kiye ja rahi hun main

kitna buland hai meri tamir ka mazaq
taron ko aaftab kiye ja rahi hun main

kyon main gunah-e-ishq se darti hun is qadar
hasti ko kyon azab kiye ja rahi hun main

'najma' nigah-e-shauq ko hadd-e-nigah tak
jalwon se faiz-yab kiye ja rahi hun main