jannat se nikala na jahannum se nikala
us ne to mujhe khosha-e-gandum se nikala

rakha hai mujhe aaj talak mauj mein us ne
jis lahar ko girdab-o-talatum se nikala

ye bhul hi baitha tha zaban rakhta hun main bhi
so khud ko tere sahr-e-takallum se nikala

is aadat-e-takhir ko ek umr hai darkar
mushkil se tabiat ko taqaddum se nikala

tadbir ko taqdir ki ghaflat se jagaya
ummid ko bhi tohmat-e-anjum se nikala

lagta tha nikal hi nahin paunga 'suhail' ab
us ne to mujhe ek tabassum se nikala