jata raha qalb se sari khudai ka ishq
qabil-e-tarif hai tere fidai ka ishq

kaisi musibat hai ye gul ko khamoshi ka shauq
bulbul-e-betab ko harza-sarai ka ishq

pad gai bakne ki lat warna yahan tak na tha
waiz-e-na-faham ko harza-sarai ka ishq

karta hun jo bar bar bosa-e-rukh ka sawal
husn ke sadqe se hai mujh ko gadai ka ishq

tum ko khuda ne diya sari khudai ka husn
mujh ko ata kar diya sari khudai ka ishq

aashiq o mashuq ki hae nibhe kis tarah
un ko kudurat ka shauq mujh ko safai ka ishq

puchh le 'parwin' se ya qais se daryaft kar
shahr mein mashhur hai tere fidai ka ishq