jazba-o-ehsas ki shiddat ka andaza hua
har nafas har sans mein chahat ka andaza hua

khwab chehra sard lab aankhon mein chingari ki rut
waqt-e-rukhsat dil ki kaifiyyat ka andaza hua

hijr ka mausam jab aae wasl ki khushbu khule
faslon ke darmiyan qurbat ka andaza hua

qatra-e-shabnam mein dekhun shoalagi ka madd-o-jazr
subh se hi sham ki surat ka andaza hua

dekh kar aatish-ba-jaan kuchh muztarib wo bhi hue
un se mil kar dard ki daulat ka andaza hua