ji tarasta hai muskurane ko
aag lag jae is zamane ko

ahl-e-duniya ne khel samjha hai
is zamane mein dil lagane ko

kash aisa bhi ek din hota
aap sunte mere fasane ko

ye rawish hai to khud chaman wale
khak kar denge aashiyane ko

ja-e-hairat hai kyon jahan wale
tul dete hain har fasane ko

har qadam par hain tana-o-dushnam
yaad rakkhenge hum zamane ko

ji rahe hain bas ab to ai 'rahbar'
doston ke fareb khane ko