jina muhaal ho gaya danaiyon ke sath
aaya khayal-e-yar bhi ruswaiyon ke sath

aankhon se ashk phisle to daman bhigo gae
yaadon ka qafila bhi tha shahnaiyon ke sath

rahte hain hum kahan ye pata hum se puchhiye
yaadon ki us haweli mein parchhaiyon ke sath

ek dastan raqam hai in aankhon mein zabt ki
utre to koi fikr ki gahraiyon ke sath

unchi imaraton ne falak chhu liya magar
rishte zamin pe rah gae angnaiyon ke sath