jis din se apna tarz-e-faqirana chhut gaya
shahi to mil gai dil-e-shahana chhut gaya

koi to gham-gusar tha koi to dost tha
ab kis ke pas jaen ki virana chhut gaya

duniya tamam chhut gai paimane ke liye
wo mai-kade mein aae to paimana chhut gaya

kya tez-pa the din ki tamazat ke qafile
hathon se rishta-e-shab-e-afsana chhut gaya

ek din hisab hoga ki duniya ke waste
kin sahibon ka maslak-e-rindana chhut gaya