jis ki sifat qahr-o-ghazab ke siwa nahin
waiz ka wo khuda hai hamara khuda nahin

chaaragari ka karte the dawa bahut magar
tum se ilaj-e-dard-e-mohabbat hua nahin

kya jaane ab ke aai hai kaisi ye fasl-e-gul
pahli si wo chaman ki moattar faza nahin

ai charkh tu ne sare jahan ko kiya tabah
afsos tere hathon se koi bacha nahin

bahr-e-alam mein roz hai tufan ka samna
tuti hai naw past magar hausla nahin

bhule se bhi na karna zamane ka eatibar
sab kuchh hai is jahan mein lekin wafa nahin

kashti ko khauf kya ho talatum ka ai 'riyaz'
hafiz mera khuda hai agar nakhuda nahin