jise dekha tera joya hai pyare
tujhi ko dhundhne khoya hai pyare

qasam hai dida-e-giryan ki mujh ko
ki duniya aalam-e-roya hai pyare

nihaal-e-ah hoga dana-e-ashk
ugega wo jo kuchh boya hai pyare

tujhe dil de ke main ne aazmaya
wo sikha jis ne kuchh khoya hai pyare

kisi ke kan bharne par na rakh dhyan
har ek munh mein zaban goya hai pyare

main jaga shab sar-e-gesu mein warna
jise kala dase soya hai pyare

mera dil jal-bujha shab se yahan kun
charagh-e-murda par roya hai pyare

nazara kab kiya us chashm-e-tar ne
abas daman tera dhoya hai pyare

mila do lab kahan ka aab-e-haiwan
khizar ka rasta khoya hai pyare

kafan apne 'nasim'-e-kushta ka sunkh
har ek barg-e-gul boya hai pyare