jism se dur the ki lat bhi to lag sakti thi
hum ko is khel ki aadat bhi to lag sakti thi

jab gale mere musibat hi koi lagni thi
to gale se ye mohabbat bhi to lag sakti thi

un ko har haal mera qatl tha karna warna
mere iman ki qimat bhi to lag sakti thi

kam se kam nam nadamat se na len bachche mere
mujh se aisi koi tohmat bhi to lag sakti thi

saikdon bar lagi hath ye gham ki daulat
ek dafa hath masarrat bhi to lag sakti thi

dosti tum se badhane mein ye khatra tha mujhe
dosti tum ko mohabbat bhi to lag sakti thi

jaise duniya ki tumhein aab-o-hawa ras aai
tum ko achchhi meri sohbat bhi to lag sakti thi

main ne is dar se bulaya nahin milne tanha
tum ko khoti meri niyyat bhi to lag sakti thi