jo daulat aur taqat ke nashe mein chur hota hai
parakh lije use wo aadmi maghrur hota hai

ho na-farman beta to sukun ghar mein nahin rahta
ye gham man-bap ke dil ke liye nasur hota hai

chalo aao jalaen ilm ki qindil ghar ghar mein
isi qindil se dil ka andhera dur hota hai

use malum hai patthar yaqinan us pe barsenge
magar sach bolne ko aaina majbur hota hai

kisi ke chahne se kuchh nahin hota hai ai zahid
wahi hota hai jo allah ko manzur hota hai