jo donon mein judai marhala hai
yahi wo intihai marhala hai

tumhaari intiha dekhi to samjha
ye mera ibtidai marhala hai

utha kar ungliyan sab hans rahe hain
samajh lo jag-hansai marhala hai

bata do dudh ka koi dhula hai
yahan ab parsai marhala hai

ye mutthi bhar hi lashkar se ladenge
ki phir se karbalai marhala hai

'razi' sansen meri marzi nahin hai
qasam se ye khudai marhala hai