kabhi sadiyon ko lamha marta hai
kabhi dariya ko qatra marta hai

kahin par ek ko majme ne mara
kahin majme ko tanha marta hai

main ye fahm-o-farasat bech to dun
mujhe dil ka katahra marta hai

hawale jab se tere dil kiya hai
use tera hawala marta hai

tujhe ghar se bhaga sakta hun tere
magar bahnon ka chehra marta hai

mohabbat se meri tum jaan le lo
mujhe bas sard lahja marta hai

adu kanpe hai mera nam sun kar
mujhe mera masiha marta hai

main jis par farz ki takmil kar dun
wo mere haq pe daka marta hai

mere malik tera banda nahin kya
wo jo mazdur bachcha marta hai