jo har qadam pe andheron se ladne wale hain
hamare sath mohabbat ke wo ujale hain

wo jaante hain jo tarikh padhne wale hain
hamin ne gardish-e-dauran ke bal nikale hain

banae phirte hain hum khud ko khush-libas magar
hamare ghar mein abhi makdiyon ke jale hain

khulus-o-rabt-o-mohabbat jinhen mayassar hai
wo log kaun si duniya ke rahne wale hain

dayar-e-ghair mein tum kyun talash karte ho
hamare shahr mein kya ahl-e-fan ke lale hain

jinhen ye ahl-e-basirat samet lae the
wo hadse kisi aashufta sar ne tale hain

hazar daur-e-taraqqi ke baad bhi 'nusrat'
qadam qadam pe abhi 'mir' ke hawale hain