jo is zamin pe rahte the aasman se log
kahan gae wo mere sare mehrban se log

ye be-charagh si basti ye be-sada galiyan
har ek samt ye ujde hue makan se log

sar-e-nawishta-e-taqdir khwab ki surat
likhe hain ret pe kuchh harf-e-raegan se log

ki ye asar to nahin un ki faqa-masti ka
phir aaj tang hue hain jo apni jaan se log

kuchh is mein hasb-e-zarurat kiye gae shamil
kuchh hum ne hazf kiye apni dastan se log

abhi na khatm hua tha fasana-e-hasti
gurez karne lage apne darmiyan se log

padi hai ret pe tuti hui wo kashti-e-khak
ki ud rahe hain hawaon mein baadban se log

tujhe to apni hi jaan ki padi hui hai 'kamal'
guzar rahe hain yahan par kis imtihan se log