makin hun aur hudud-e-makan nahin malum
sunane baith gaya dastan nahin malum

dil-e-hazin ko karam ki umid karne de
abhi use teri majburiyan nahin malum

guzar rahi hai bas ek soz-o-karb paiham mein
kahan jala tha mera aashiyan nahin malum

sukun se muntazir-e-imtiyaz hai ab tak
meri jabin ko tera aastan nahin malum

kisi ko un ka pata kya bataen ai 'ali'
hamein to aap hi apna nishan nahin malum