jo is zulf-e-pechan ko hum dekhte hain
dhuan sa ye har pech-o-kham dekhte hain

nazar un ki kamzor itni hui hai
ki ainak se bhi ab wo kam dekhte hain

sanpolon ko rakhte the jin mein chhupa kar
ab un aastinon mein bam dekhte hain

tere mai-kade ke bala-nosh mai-kash
na jin dekhte hain na ram dekhte hain

wo guzre hain motor se pakki sadak par
abas log naqsh-e-qadam dekhte hain

bahut din rahe aap pindi mein 'bulbul'
chalo ab chalen torkham dekhte hain