jo khalaon mein chamakte hain ujale le kar
tere hi dar se wo laute hain ziya le le kar

sang-rezon se mili aabla-pai jis ko
kis ko dikhlae kahan jae wo chhaale le kar

kal kisi baat pe bhai se bahas kar baitha
log aae hain namakdan mein dawa le le kar

khak chhane hai koi ku-e-adalat ki miyan
darjanon sar pe subuton ke hawale le kar

ho ke be-khauf sitam-karda hawaon se hanuz
koi pahuncha hai andheron mein ujale le kar

ruk mere dil zara taftish to karne de mujhe
kaise aai hai khizan rang nirale le kar

aaj phir jaan luta dega koi parwana
shama raushan jo hui maut ke bhaale le kar