jo khush hua hai charaghon ka sar qalam kar ke
chala na jae mohabbat ko kal-adam kar ke

use talash nae manzaron ki rahti hai
ujale laya hai tarikiyon mein zam kar ke

hawa ki tarah talawwun shiar tha to sahi
magar wo shakhs gaya faisle raqam kar ke

hamare khwab andheron ke yarghamali hain
sipah-e-shab ko sar-e-sham be-alam kar ke

ana ke ped pe shayad samar malal ka ho
zara sa dekh to lun rabte baham kar ke

hawa mein tairte rahte hain aur rukte nahin
ye kis ne chhod diya jugnuon ko ram kar ke

'kafil' le ke koi muzhda-e-sahab aaya
jab aag ja chuki sab aashiyan bhasam kar ke