jo lab par teri dastan rakh rahe hain
charaghon ki lau par zaban rakh rahe hain

hamein log kahte hain ghaddar yaro
kahan ki khabar hai kahan rakh rahe hain

wo kya khak pahunchenge unchaiyon par
zaminon pe jo aasman rakh rahe hain

hamein wapsi ka yaqin hai tabhi to
kinare pe hum kashtiyan rakh rahe hain

diya ban ke jalta hun main jin ki khatir
wahi rah mein aandhiyan rakh rahe hain

wo ai 'nur' talwar kaise uthaen
kitabon mein jo titliyan rakh rahe hain