jo lazzat dard mein hai jaante hain
use mearaj-e-dil gardante hain

kahin kuchh to sukun milta jahan mein
ye mausam dard ka hai mante hain

ye apni be-hisi ki intiha hai
ki qatil ko masiha mante hain

ye khush-fahmi nahin to aur kya hai
unhen apna jo hum gardante hain

saza-war-e-mohabbat aur bhi hain
hamin par aap khanjar tante hain

tayyun kar to len wo samt-e-manzil
'ziya' jo khak-e-sahra chhante hain