jo pad gai thi girah dil mein kholte hum bhi
wo baat karta to kuchh us se bolte hum bhi

hawa ko kis ne chhua hai jo tujh ko chhu pate
khala mein phirte hain rasta tatolte hum bhi

kahan pe thahren ki manind-e-barg-e-awara
hawa ke dosh pe phirte hain dolte hum bhi

andhera shahr ki galiyon ka ghar mein dar aata
zara jo raat ko darwaza kholte hum bhi

'qamar' ye lutf na jine ka phir hamein aata
lahu main zahr agar khud na gholte hum bhi