jo wasf rakkha hai wo be-misal rakkha hai
bashar mein apna khuda ne jamal rakkha hai

unhen to bakhshi hain khushiyan banane wale ne
hamare waste ranj-o-malal rakkha hai

har ek lamha nai aafaten utarti hain
hamara kitna falak ne khayal rakkha hai

hamari bazm mein aao to ghair se bhi milo
ye mere samne us ne sawal rakkha hai

ye kis ke dhoke mein maikhane aa gae waiz
aman mein hum hain tumhein bhi sanbhaal rakkha hai

kuchh apne jaib-o-gareban ki sudh to le 'saqi'
bana ke tu ne ajab apna haal rakkha hai