wo shoalagi wo soz-e-darun kaun le gaya
mujh se meri mata-e-junun kaun le gaya

honton pe baad-e-marg tabassum ko dekhiye
ahl-e-junun ka haal-e-zabun kaun le gaya

kis ne chaman ujad diya tere husn ka
ai dost tera sara fusun kaun le gaya

tari jahan pe zulmat-e-jahl-o-fasad hai
ilm-o-amal se jazb-e-darun kaun le gaya

'ghaalib' bhi nahin 'mir' nahin 'dagh' bhi nahin
ashaar-e-nau se sehr-o-fusun kaun le gaya

'saqi' wahi hai mai bhi wahi mai-kada wahi
phir dil se tere josh-e-junun kaun le gaya