jo yun aap bairun-e-dar jaenge
khuda jaane kis kis ke ghar jaenge

shab-e-hijr mein ek din dekhna
agar zindagi hai to mar jaenge

abas ghar se apne nikale hai tu
bhala hum tujhe chhod kar jaenge

musafir hain lekin nahin jaante
kahan se hum aae kidhar jaenge

tamanna mein bose ki kahta hai ji
badan se nikal bhi agar jaenge

tu hai ek-dam aur hazaron umid
labon pe koi dam thahar jaenge

ba-hurmat nibhi ab talak jis tarah
huzur itne din bhi guzar jaenge