josh par yun jazba-e-be-ikhtiyar aa hi gaya
dekh kar un ko barahna mujh ko pyar aa hi gaya

ghair jab khalwat se nikla daud kar main ne kaha
dusra bhi aap ka umid-war aa hi gaya

tha nazakat se bahut majbur phir bhi baad-e-marg
sala uthta baithta su-e-mazar aa hi gaya

us ka sine se lipatna tha ki taskin ho gai
be-qarari ko meri kuchh to qarar aa hi gaya

intizari mein kisi ke raat bhar tadpa kiye
jhute wade ka kisi ke e'tibar aa hi gaya

un ka bimar-e-mohabbat sunte hi elan-e-did
tham kar dil girta padta be-qarar aa hi gaya

khauf-e-badnami se go aksar chhupaya jurm ko
lab par un ka nam phir bhi bar bar aa hi gaya