juda bhi ho ke wo ek pal kabhi juda na hua
ye aur baat ki dekhe use zamana hua

na puchh mera pata mauja-e-hawa hun main
bhala hawa ka bhi koi kabhi thikana hua

har ek samt sahife khule pade the yahan
tera nasib ki tu harf-ashna na hua

panah milti kise meri kibriyai se
khuda ka shukr main banda hua khuda na hua

is apni khoj mein kya kya khule na bhed magar
main hun bhi ya ki nahin mujh pe aaina na hua

nida-e-ghaib thi teri sada thi dhadkan thi
mere shuur se itna bhi faisla na hua

shajar to rah ka saya hain un ko kya malum
kahan se aaya musafir kidhar rawana hua

faqir ho ke liya tu ne kya 'bashir' ki jab
galim-posh bhi tu ho ke ba-safa na hua