junun-e-dil ko kisi ka bhi eatibar nahin
hun be-qarar magar khwahish-e-qarar nahin

hai kaenat mein hum se farogh-e-rang-e-bahaar
magar hayat mein apni zara bahaar nahin

na chhed pyar ke naghme ai andalib-e-chaman
ki rang gulshan-e-hasti ka sazgar nahin

tufail hai ye unhin ka ki hum ko tohfe mein
wo be-hisab mile gham ki kuchh shumar nahin

'asad' khula na kabhi raaz-e-zindagi ab tak
ye uqda khole koi aisa hoshiyar nahin