junun ke taur hum idrak hi se bandhte hain
ki tir-o-tar ko fitrak hi se bandhte hain

bayon ko shakh-e-gul-e-tar hi ras aati hai
agarche ghonsle khashak hi se bandhte hain

falak se nur-o-tamazat to lete hain lekin
shajar jadon ko faqat khak hi se bandhte hain

lahu se sarf-e-nazar ki ajab riwayat hai
umid-e-nashsha yahan tak hi se bandhte hain

hum apne hathon pe itraate hain magar 'arshad'
tilism-e-kuza-gari chaak hi se bandhte hain